balaki ko

kahilakon sa kamingaw

2011-06-08T15:23:00.000-07:00

mugna ni jabberedonion:

nagtubod akong mata sa mga luha nga kaganina pa gusto mudagayday sa akong aping

ang akong kasingkasing di muhunong ug lagubo.
dungog bisan sa pikas baryo.

gusto nako motyabaw sa kamingaw.

intawn kaluy-i mahadlok kog mamaw.

pasiga-a ang suga kay ngitngit wa koy makita.

Summer of '92

2011-05-09T22:55:00.000-07:00

mugna ni: joythedestroyer

Usik!
Aron lang makasinati sa langitnong dulsi,
nausik ang tanan.
(Di nalang gyud kahuwat)

Sa sinugdan - gilugit, gikuot, gikulitog
Sa kahuot sa lungag punayg paninguha
(Daw nakigbisog sa unsang gubata -
armas ang kutsara, tagsang pamalikas
ug naglawit nga dila)
Aron moluwa ug pipila ka sensilyo.

Unsa nalang! Karon wa na gyud kapugngi (bisag
ang mga pinong kusi sa bugan)
ang kaganinang himsog nga sementong anay
karon napukan sa way
kukaluoy nga martilyo.
Ang pinintalang ngislit
sa iyang dagway
napikas daw naulaw
sa iyang natagamtam.
Bahandi nga natigum
sa panahong nangagi,
linugdangan nalang sa paghandum.

Kamatuoran

2010-12-22T20:48:00.000-08:00

mugna ni: gabon

Pagkamingaw sa kamingaw.

Pagkalaay sa kalaay.

Pagkaguol sa kaguol.

Pagkangitngit sa kangit-ngit.

Pagkabugnaw sa katugnaw.

Tanang butang malabwan.

Tanang butang kahibulungan.

Tanang butang katingalahan.

Tanang butang hilakan.

Adunay panahon alang sa tanan.

mga hinyap sa pasko

2010-12-14T18:35:00.000-08:00

mugna ni: amber

mabugnaw na ang panahon
mabati na ang kamalipayon
timailhan sa katapusang bulan
gasingabot na ang kapaskuhan

pero tabi, andam na ba kita?
dili sa pagputos ug mga gasa
dili sa pagtambong ug mga party
ug dili sa pagluto ug mga putahe

nadawat na ba ang mga bonus
ug uban pang laing pinutos?
mao ba kini ang diwa sa pasko?
bi, sa makadiyot, hinguklugi kuno

duha ka libo ka tuig na ang milabay
ang atong Ginoo mianhi, nagpakatawhay
tungod sa dakong gugma nibiya sa langit
nanaug, gihayagan ang yuta nga mangitngit

angayan lamang nga kita mangandam
sa pag-abot sa bata, natawo sa lunangan
takus ug putli nga mosaulog Kaniya
kay Siya mianhi aron maluwas kita

tinubagay ni hypher_men ug amber

2010-12-14T03:46:00.000-08:00

mugna ni: amber ug hypher_men

hypher_men:

Kng makab-ot man nko ang bulan
Ako ni e dribol2x sa imong atobangan
Mailog mo kaha?

amber:

Ug unsaon man pud nako ang bola
Nga ako man gyud pugson ug ilog diha sa imoha?
Maayo unta to ug akong maprenda
Kay diha-diha dayon ako nang idagan sa ahensya.

*kining maong balak kinutlo sa cebucircle.com, kung asa nagtinubagay si hypher_men ug amber sa ilang pagsuway ug balak.

garay sa timawa

2010-09-03T07:51:00.000-07:00

mugna ni: kaliwatnicarlos

salingsing sa pagmahay
sa lapyong gihay ning akong kiliran
didto ko gipanghayhay mga pagbangotang way tugbang
pagbangutang kansang hinungdan gugmang hinalad sa usa ka Bathaluman

gugmang putli ug lunsay
apan inday ngano man imong gisalikway?
gugmang pagkabalaan
apan nganong imo mang giyam-iran?

lintunganay aron apdo sa kasakit
mao nay king kalipay
ug aron banwa sa kagul-anan mao nay pagapuy-an

pinangga kung asa ka man karon
pamatia king linalang nga nagbangotan
balik na intawn ning kiliran
aron king salingsing sa pagmahay
di modalid ug mogamot ning dughan
latas sa mga katuigan...

Kilumkilom

2010-07-30T08:26:00.000-07:00

mugna ni: Clado

Mawala ka man apan nahibaw ko nga ikaw mahibalik ra kay tungod mao da kini ang dagan sa atong panahon. Mubiya sa makadiyot apan ugma damlag nahibaw ‘ta nga ikaw magpakita ug mahikaplagan da pagusab.

Daghan ang mingawn kung ang imong gipakita nga kanindot way sama. Daw mura pud ka’g usa ka maanyag nga dalaga nga nagpasiplat sa bintana sa gamay’ng payag sa may eskina.

Ug kung mawala ka man hinaut nga ako di mo hikalimtan. Ako nga naghuwat sa imong kaanyag ug kapiskay. Hangtud sa hangtud ania ra ako nag handuraw ug nag nangandoy nga ikaw mulingkod tupad kanako sa akong lantay.

sa kamatayon

2010-07-27T22:16:00.000-07:00

mugna ni: jabberedonion

lumsi ko sa mga luha mo sa pagmahay

luba-a ko sa gugma nga akong gipangandoy

ratrati ko sa imong armalayt nga gibalahan ug mga pulong sa pagpangamuyo

buhata ang tanan,

kay ang patay dili mubangon para patyon pag-usab

Puhon

2010-07-27T05:05:00.000-07:00

mugna ni: Gabon

Kung wala gayud makabot ang gihandum
Kinahanglan ba kaha ako nga mag magulanon?
Di lalim pero kinahanglan pug-on
Ang mga luha sa aping padaganon

Bisan paman dili niya mabatyagan
Sa imong pagbakhu nanghinaot ka nga iyang madunggan
Apan pakyas da gihapon ang tanan
Kay siya anaa sa laing kiliran

Ugma damlag unta maulian
Ki'ng dughan nga samaran
Puhon makabot da ang tanan
Apan sa lain nga kiliran

Baws-baws

2010-07-15T23:57:00.000-07:00

mugna ni: j.anton-rios

Ikaw ma'y "it" karon
Gukda ko
Modagan ko'g kusog
Mokatkat ug kahoy
Maghipi-hipi sa mga ngitngit nga lugar
Aron lang di ko nimo maabtan
Sagdi la'g hangakon ka
O kundi ba maugtas sa pinangita
Kung asa ko
Baws-baws ra bitaw ta aning duwaa
Sunod, ako na pud ang maboang
Ug pinangita nimo

Manglaki 'ta Na!

2010-06-28T00:24:00.000-07:00

mugna ni: j.anton-rios

Ang ngabil, pintali ug pagmaayo
Hangtud mura na'g dugo sa kapuwa.
Ang mga mata, ayoha sa paglinya
Aron molutaw bisan ngitngit.
Ang ilong ug agtang
Pulbusi gyud intawon aron dili mosinaw.
Ang mga aaping, palingina,
lahi-a ang kolor, kanang mura ra'g bag-ong gikusi.
Mahuman na gani ka, pahiyom atubangan sa samin.
"Tara, manglaki na ta.
Pangitaon nato atong kaugalingon
Sa ubang taw."

Buot Ko

2010-06-27T04:04:00.000-07:00

mugna ni: lumot

Ya, tambagi ko
Gikasab-an
kay
Nagbuot-buot ko
Unsa'y buhaton
Ko, Ya?
Magbuot lang ko?
Di mahimo, Ya.
Kasab-an ko.
Mahimong
Dili na lang?
Wala na lang?
Mahimo ko
lang kining
Hikalimtan.
Ya.
Tambagi ko.
Gikasab-an ko.
Gitamay,
Ug mitikoko
Ang kalag ko.
Mingloklok,
Gitaban ang
Akong dughan
Ug ang nagpahipi
Niini,
Sa dapit,
Hain na?
Wala ko kahibalo.
Ya, tambagi ako.
Hain ka na?
Gikasab-an ko.
Kay way buot
ko.
Gahini ako
Ning ilang
Gimandong
Buot.
Ya...
Hain ka na?
Tabanga ko.
May buot na ba ko?

Uwan

2010-06-25T08:40:00.001-07:00

mugna ni: lumot

Uwan sa gawas
Uwan sa sulod
Sa akong pangutok nga way unod
Ang akong huna- huna
Pulos bakak
Pulos mugna
Pulos panghapuhap
Sa akong kalag

Uwan sa gawas
Uwan na pud
Gabanaw sa dagwayng
Murag hubog
Nangaliya'g gugma luyo sa lapok
Nangukay
Namungkal
Sa mga yutang miuban sa lunop

Uwan
Uwan
Uwan na pud.

hait

2010-06-19T00:24:00.000-07:00

mugna ni: jabberedonion

sa among balay tanan hait.

hait nga hinagiban,
kanunay'ng gibaid sa akong amahan.

hait nga mga pulong,
sa akong inahan wa'y maka pugong.

hait nga panutok,
ni manang maka kutaw ug utok.

hait nga kumo,
si manoy andam mang momo.

busa ikaw di angay magpasakit,
kay unya ikaw maka-igit ug hait.

Gibyaan

2010-06-18T09:13:00.003-07:00

mugna ni: Gabon

Handumon ko nalang ang panahon nga ikaw ania sa akong kiliran
Ang imong pahumot nga dili mawala sa akong ginhawaan
Mga gakos nga dili gayud makalimtan
Nganong ikaw mipalayo man?

Sa panahon nga ako maginusara, dagway mo ang naa sa huna-huna
Sakit kaayo og dili nako makaya
Ang imong gibilin nga sakit
Nanghinaot nga ikaw mubalik pa

Wala nalang unta ka naminaw sa ilang mga hung-hung
Ang tanan dili ang kamatuoran
Gihigugma tika sa walay pag duha-duha
Intawn balik na.

Kung dili man gyud ikaw para kanako ug ako para kanimo
Nganong dili man tika makalimtan
Nganong ikaw pirmi naa sa akong alimpatakan
Ngano da ang pangutana sa adlaw nga tanan.

Salamat sa pizza

2010-06-15T01:01:00.001-07:00

mugna ni: inday iko

Salamat sa pizza,
kay sa kanatong duha
kagutom nawala na.
Sa una ako nangimbita,
pero saktong oras wala kita.
Karong gabhiuna
nagkaabot ra gyud ta.
Nangaon.
Nangatawa.
Nagkaistorya.

isa ka balde ug tunga

2010-06-14T08:35:00.000-07:00

mugna ni: jabberedonion

sa kasilyas, samtang nagpungko sa inidoro
akong gi tutukan ang isa ka balde ug tunga,
nga mao nalang ang natilok gikan sa among baril.
paeta biya aning magnihit ang tubig,
gidungagan pa sa hilabihan nga kainit sa panahon.
kailangan jud kang maligo.

pero sama sa nahibiling isa ka plato nga inun-unan,
busa pa nimo matagamtam ang ka importante sa butang kung hapit na kini mahurot.

tulo ka kabo ang nawaswas.
lain pang tulo ang nabanlaw.
duha ang gilaba sa panti.
isa para panutbras.

maayo nalang gani akong gisawd ang akong gikaligo
kay naa pa koy na plas sa barado nga inidoro.

dili ko kinahanglan ug kwarta

2010-06-12T00:54:00.000-07:00

mugna ni: inday iko

dili ko kinahanglan ug kwarta,
daghan kaayo ana ning kalibutana.
dili ko kinahanglan ug diyamante,
pirmi man kong elegante.
akong kinahanglan, ikaw
ug ang imong mga braso,
nga muhapak sa palo-palo,
ug ang imong mga kamot,
nga maayo kaayo mukuso-kuso.

Sa dihang wala nimo nadawat ang akong suwat

2010-06-08T22:07:00.000-07:00

mugna ni: Tendeng

Sa dihang wala nimo nadawat ang akong suwat, nangluod, nidangoyngoy ang buwan sa pusod sa kagabhion.

Ang mga titik sa kong suwat
nanggubat didto sa kalasangan
sa imong lawas, dala
ang mga hinagibang halok ug kagus.

Ug didto, gihibalag nila
ang matag pulgada atong yutaa,
ang mga punoan, mga buwak,
ug ang nag-agay nga suba
hangtud nagduggan ko
ang agungoy sa irong uwagan.

Basted!

2010-06-07T07:34:00.000-07:00

mugna ni: Gabon

Lahi ra gyud kung ikaw wala niya gihigumga
Lahi ra gyud bisag imo na gipakita kaniya
Lahi ra gyud ang adlaw kung di ka maka huna-huna
Maka huna-huna sa mga kasakit nga gidala

Lahi ra gyud bisag gipabuhagay na
Lahi ra gyud kay tingali'g wala gyuy pag-asa
Lahi ra gyud kung kalipay maangkon na
Maangkon man lang bisag sa makadiyot sa?

Diyeta

2010-06-02T21:20:00.000-07:00

mugna ni: Yona

Hago kung mag duko
Labi na kung mag tiku-ko

Hangakon kung musaka ug hagdan
Sus, mag lisod tawon ug dagan

Mga sanina di na ma-igo
Kay ang bilbil hastang kadagko

Kani di na insakto
Pastilan, mag diyeta na jud ko.

Kaslonon

2010-06-01T05:29:00.000-07:00

mugna ni: dodong

Nag ka du.ol na ang adlaw na ako mahikot.
Ang kasing-kasing kong malumay,
mahimong piniriso sa walay kinatapusang relasyon.
Gugma kong putli, o! akong asawa kanimo ako i-gasa.

minugbo ni inday iko

2010-05-27T07:05:00.000-07:00

mugna ni: inday iko

gahuwat ang dagat
sa halok sa panganod
pamaagi sa uwan.
nahimout ang panganod
nga sa ilang kalay-on
parehas silang basa.

------------------------------------------

pasabta ko ngano
kung mutan-aw ko sa imong dagway
makit-an nako akong nawong.
dili ba kaha
gamantika na sa taman
ang imong aping ug agtang?

------------------------------------------

magbitbit ko ug tissue
akong itunol nimo
kung magmantika man imo nawong
naa ka dayon ikatrapo

Ikaw Ug Ang Baybayon

2010-05-25T06:36:00.000-07:00

mugna ni: j.anton-rios

Gimingaw ko sa baybayon.
Ang paghuwap sa hangin sa akong likod;
Ang paghalok sa adlaw sa akong aping;
Ug ang baho sa asin sa tubig.
Kining tanan isip handumanan lamang,
Sa imong huwap, halok, ug baho.
Nanghinaot ko nga makatusmaw kanimo pag-usab.

Mga Mugna nga Minugbo

2010-05-24T20:56:00.000-07:00

mugna ni: inday iko

nilantaw ko sa kawanangan,
nakita ko sa dakong hawan
sinaw, linging mga ubas.
niduol ko, gihikap ko.
oi! gakalandrakas nga mga pasas.

------------------------------------

sa pagsusi ko sa among humayan
giatubang ko dakung katingaladhan
mga humay hinay-hinayng nagkawagtang
pero mga maya di maihap sa kadaghan
sidlak sa adlaw nagkakusgan
pero mga basa gapuno sa kahawanan

------------------------------------

pssst!
nakagusto ko nimo.
nakagusto ka nako.
pero kanus-a pa man kining gusto,
magkatakdo ug mainsakto?

gitubol

2010-05-22T21:36:00.000-07:00

mugna ni: jabberedonion

kumusta kaha to siya?
wala man jud nagparamdam ang kagwang oi.
kamilyon na nako gilili akong cellphone,
bisan anino sa facebook wala pud.

unta, ok ra to siya.
nalingaw ra pud siguro siya didto oi.
sa kadaghan sa iyang mabisita nga lugar, syaro.
nag-enjoy jud to, sure ko.

hay...
ako intawn diri
gikapoy ug inutong
sa tubol nga ga ung-ong.

dughan nga ga rigor

2010-05-21T00:05:00.000-07:00

mugna ni: jabberedonion

kusog ang lagubo sa dughan nga ga rigor.
madungog, bisan sa kalanog sa andar sa bintilador.

hinaot sa iyang kasipa, imong mapaminaw
ang gibati sa dughan nga hingpit gimingaw.

Dako Gamay

2010-05-19T03:21:00.001-07:00

mugna ni: Ad Hector

Dili ko nimo mabasol
Kung dili nako mapugngan
Ang akong mga tudlo
Nga mopalibot niining
Unura.
Hingpit akong pagkamingaw.
Sa pagsugat sa init sa
Akong lawas
Ug sa kabugnaw sa hangin,
Dili nako mapugngan
Ang akong singot
Sa pagtulo
Gikan sa akong agtang
Ubos sa akong mata.
(Wala ko naghilak,
Pramis.
Halang lang g'yud.)
Busa ayaw ko basola
Kung isulod ko ni
Sa akong baba,
dayon ngala-ngala,
dayon tutunlan.
Wala man ko maihas ba.
Makit-an man ko ni
Kada-adlaw.
Hikapon, ug
limpiyohan pa gani.
Mas dako lang imo gamay,
I think.
Dili kaayo ko sure.
Gapiyong man gud ko,
Mintras gilanghap nako
Ang humot sa Safeguard
nga puti
nga niataki sa akong ilong.
Mura'g kumoton akong dughan.
Mao'ng dili nako mapugngan
Nga palipayon ka
Hangtod mapul-an ka nako.
Mapul-an ka nako.
Mapul-an ra unya ka nako.

Ang Hubog sa Tulda

2010-05-12T09:03:00.001-07:00

mugna ni: Ad Hector

Diri sa sulod sa among tulda
Adunay naghagok nga hubog,
Batan-on, ug wala pa siguro
Kaamgo ug tumang paghigawad,
Dili sama sa kinsa dihang mga
nalugosan, nasunogan, namatyan,
nawad-an sa tanan-tanan.
Pero sa iyang mga mata ganina,
Samtang nagpalumos sa ginalong
Sirbesa, makita ang uhaw,
Ang pangandoy sa kaugmaong
Lagmit dili na maabot.
Rason niya: "Bata pa ko,
Daghan pang tuig para
maninguha. Busa karon,
Tagay pa, bai!"
Pero sa pagbug-at sa iyang
Mga tabontabon, sa pagkaluya
Sa iyang mga unod,
Sa pagkahagba niya sulod diri
Kung asa nisunup na ang ulan
sa kaadlawn, nakapangaliya
Siya nga unta naay kamatuoran
Iyang mga yam-it.

Dayon tulog, nagakulob,
Nahinanok,
Daw higanteng troso
Nga dili na
ma-irog.

Papel

2010-05-11T15:45:00.001-07:00

mugna ni: Tendeng

(alang sa mga mag-uuma sa Sumilao, Bukidnon)

Usa ka libo ug pito ka gatos nga kilometro, ang gilay-on sa balaod, ug kini pod ang nagtimbang sa gibug-aton sa inyong mga tiil, ug gikusgon sa inyong mga tikang sa inyong pagbaktas sa Sumilao hangtud Malacañang.

Gipaningot, gilumsan mo sa kainit sa adlaw.
Ang inyong mga esmagol, dugay na nga nipanaw.
Ug kini, inyong gitigom, puhon ilubong, ampoan didto kung diin ang mga buaya ug bitin nagagikan.

Matag tunob ninyo sa yuta, nadunggan ang hustisya ug labihan na, kadtong buntaga didto sa Mendiola.
Sa kataposan, ang kabaga sa kubal sa inyong lapalapa, di sama kabaga anang papel nga naay pirma ni Gloria.

Paghimamat

2010-05-08T05:31:00.000-07:00

mugna ni: Charlie8937

Usa ka higayon niana, nanag-abot ang among tagsa-tagsa ka mga dalan. Nagkurus ang duha ka managlahing direksyon apan sa tunga-tunga naundang kadiyot ang among mga panikaysikay aron sa paghinuklog sa among kahimtang.

Daw ang kapalaran hilig maniaw-tiaw tungod kay kung kinsa ang dili angay managkita hatagan pa jud sa higayon nga madagma asa usag-usa.

Kinsa ang magtuong mamahimo pa kini? Nga bisan gani sa pangagpas o pagdahum mang lamang wala kini masulod sa akong alimpatakan. Nga bisan sa pangandoy nagdahom ko nga kutob lamang sa panghuna-huna, wala’y higayon nga mamahimong tinuod o mahikam. Daw sa panganod nga sa mga mata lamang mahimamat apan dili mutugdong sa mga palad.

Apan ang panganod nikanaog sa yuta aron sa pagpahibaw sa iyang pagka-siya, sa pagpamatuod nga kini dili lamang sa mga mata masaksihan kung dili mahapuhap sa mga kamot, maginhawa sa ilong, mahagkan sa ngabil, mahapyod sa dughan og mabati sa kasing-kasing.

Angayan Dili

2010-05-03T17:43:00.000-07:00

mugna ni: Charlie8937

Kung matugkad ko man ang gilawmon sa dagat mahisabtan ko ba kaha ang kahalapad sa imong pasensya, ang kasakit sa imong pag-antos, ang katakos sa imong gugma?

Wala mahanaw sa akong panghunahuna ang kapalaran nga nagbugkos sa atong mga kinabuhi. Dili lalim ang mahigugma apan angayan dili.

Sama sa anghel nga mikanaog sa yuta aron makighiusa sa mga tao, o sa demonyong pugos nagpakatao para sa kasingkasing sa usa ka putli.

Ang sakripisyo nga way sama dili mabayran og bisan unsa. Ang gugma pagasuklian og gugma, ang pagpasensya sa usab pagpasensya.

Apan dili tanang paghatag mabayluan og pagdawat. May mga higayon nga walay madawat ang usa gikan sa iyang pagsakripisyo. Tungod kay dili angayan o dili pa nakatakna. Ang pagpasensya mao ang tubag sa tanan. Tungod ka yang tao nga nia niini magrasyahan sa iyang pagpaabot.

Basin sa pagkakaron ang pagkab-ot sa gihinam usa ka pangandoy pa lamang pero mamahimong uyon sa tukmang panahon.

Asa Namatay si Inday

2010-05-01T09:31:00.001-07:00

mugna ni: Tendeng

Pasado alas kwatro sa kahapunon. Didto sila nagkaila ni Dodong sa usa ka tungha-an sumala pa ni kapalaran. Sa iyang gibarugan, gigutom siya ug nagkurog ambot lang kung ngano. Samot na kadtong una niyang nalantawan ang dagway ni Dodong nga hinayhinay siyang kitagoan sa di niya masabtan nga panahon nga morag wala’y kahumanan. Ug iya kining gitutukan og maayo hangtud naay unang silaba nga nilabay sa iyang pamulong. Ug sukad adto sila managhigala na. Apan sa kadugayan nangutana si Inday kung hain naman siya. Asang dapit sa kalibotan siya nagpuyo kay sa pag-abot sa mga adlaw nasinati niya ang kaputling kalipay. Ug sa kadugayan nasinati pud niya nga ang oras kay mangingilad ug kawatan kaayo. Sa mga nisunod nga mga adlaw naglikay na daw siya ni Dodong kay mahadlok siya nga moduaw si gugma ug siya lamaton. Apan sa wala damha, bisag unsaon niya balibad sa balatian wa na’y pulos ug sumala niya mas sayon pa hunongon ang pagtuyok sa kalibotan ug gilayon sa panahon. Ug sa dihang ni-abot na ang adlaw nga iya nang buakon ang kamatuoran, iyang nabati ang kahapdos sa tumang kasakit ug kapait. Labihan na kadtong naay nisawsaw sa eksena ug ambot lang sa hinampak nga kamatuoran. Didto na nagsugod ang hinungdan sa iyang way-kamatayong sakit hangtud bukog ug panit. Karon si Inday di na ganahan nga sampiton ni Dodong ang iyang ngalan, di na niya mahimong simhoton ang alimyon ni Dodong sa dihang siya molabay sa iyang likoran. Apan panaglit si Inday mouban sa iyang pag-inusara, iyang mabati nga sumpay gihapon sa iyang kaugalingon ang tanan. Ug didto kung asa niya nagawas ang iyang gininhawa, unya iyang nalatawan ang iyang panit sa iyang kamot nga ningulngul ug niburot. Didto sa daplin sa papel ug lapis nabuak siya tungod sa iyang pagsupak sa hinampak nga kamatuoran. Didto sa daplin sa papel ug lapis namatay ang bida sa akong balak.

Undangun na nato kini...

2010-04-30T01:06:00.000-07:00

mugna ni: Charlie8937

Nagsige nalang ko ani'g pamati sa awit, wala'y hinungdang pagsakit-sakit sa akong dughan. Pipila ka adlaw na ang miagi og hangtud karun wala pa'y katagbawan ang mga pangutana sa akong alimpatakan. Mahimo bang ipadagayday nalang ang mga luha sa ilawon sa pagbunok sa ulan? Ulan, asa man ka karung nagkinahanglan ko nimo?

Unsaun man pagkakaplag sa kamatuuran og paghatag og bili sa mga butang og tawo nga may igong gibug-aton sa kinabuhi sa laing tao nga mao'y nakaplagan nimo og kahayag? Dili lalim ning nahimutangan ning kabus nga timawa sama nako kay kung kanus-a makabaton ka og kalipay dili gihapon kini ingun ana katakos kay adunay mga babag sa dalan. Tinuod gayud diay nga ang kinabuhi dili usa ka dalan sa mga rosas. Kung ugaling man adunay mas daghang tunok imong angay likayan arun makab-ot ang gihinam.

Asa man ko nagkuwang? Asa man ko nasayop? Sa akong pagtawo nga dili nako mausab sa pagkakaron, o sa akong mga naagian sa kinabuhi? Ingun ana nalang gayud diay katinamay ang sama nako nga bisan sa makadiyot naghandum lang og gamayng kalipay? Intawn, pasabta ko, kay dili sayun ning mga dalan nga gitahak sa akong mga tiil.

Gusto na kong mahuman na kini, undangon ta kining pagpakasakit sa dughan, may utlanan man gayud ang tanan mas maayo pa'g sa wala'y paglangan-langan matapos na ang pag-antos ning kasingkasing, Nasagmuyo man ka sa mga panghuna-huna sama niini apan mao kini ang para kanako labing sayun og labing makatarunganon nga desisyon sa akong kinabuhi.

Kinahanglang wala na'y laing tawo nga masakitan sama sa akong pagsakit karun. Gipangamuyo ko kini sa pipila ka higayon, nga wala unta'y maahimutang sa akong gihimutangan kay ang kalawom sa samad dili mabuni pinaagi sa mga pulong lamang. Ang kahapdos sa samad dili matagbawan og mga pagbinaylu-ay sa gitawag nga gugma lamang, kung dili kini takos.

Hinaot pa unta, ikaw nga estrangherong nibutho sa akong kinabuhi, hatagan mo na sa kalinaw ang akong kalag og panghinuklugan mo ang mga kasakit ning dughan. Husto na ang mga kaagi sa makadiyot lamang. Ihunong na ang pagpaka-arun-ingnon sa imong pagbati. Undangi ko palihug lang arun makabaton ko sa akong kallinaw sa kasingkasing, panghunahuna og sa espirito nga gihikawan mo.

Undangun na nato kini...

Labhanan

2010-04-29T06:09:00.000-07:00

mugna ni: j.anton-rios

Lagi, lain ko tan-awon kay naghubo ko tanan.
Apan ang imong laway nga miuga sa akong dughan,
Sa akong tiyan, ug sa akong buko-buko nagpabilin.
Ang imong kamot nga mikatay sa akong tiilan,
Nga mibuhi sa akong pagkataw, mura'g naa pa gihapon.
Ang hilabihan mong hugota ug initang gakus
Nga mipaduol kanako sa imong lawas, nakaputos gihapon.
Mga buhok mo sa tiil, kanunay gihapong migitik sa akong kiliran.
Lagi, lain ko tan-awon
Apan dili kay naghubo ko tanan.
Lain kay hangtud karon, ikaw ra gihapon akong gisul-ob.
Kanus-a kaha ko malabhan?

utot

2010-04-28T10:35:00.000-07:00

mugna ni: jabberedonion

sakit sa buot,
makapungot
ako dughan gahuot
pwede i-utot?

Unsaon nalang

2010-04-28T05:16:00.000-07:00

mugna ni: Charlie8937

Human sa tanang panghitabo nahugno ang kalibutan, nahanaw ang bughaw nga langit og natak-upan sa bagang kadag-uman ang tibuok kawanangan.

Paghilak sa langit ang mipuli sa pahiyom sa adlaw. Tumang kagabhion ang tataw nga nihulip sa kahayag sa palibot og makabungol nga kamingaw ang nahibilin human sa awit sa mga langgam. Ang panaghoy sa mga kahoy nahulipan sa pagkuso-kuso sa unos.

Nibagnos ang masakit nga kaagi sa iyang kasingkasing og nagbilin og dakong uwat pagkahilom sa samad. Di man mahitupngan ang kalipay sa pagkakaplag apan mas lawom ang duot sa pagkawala.

Unsaun nalang ang buwak kung walay kahumot, ang langgam kung walay tingog, ang dagat kung walay tubig, ang kasingkasing kung walay gugma?

Pikon

2010-04-28T02:07:00.000-07:00

mugna ni: j.anton-rios

Ingon's mama dili na kuno ta angay magduwa
Kun magdakop-dakop, di'i ko ka-apas
Ako nala'y hangakon...
Kun tago-tago, magabhian ko'g pinangita
Makusnutan ko pirmi...
Sa tanto nakong gukod
Ug tuwad-tuwad aron lang makit-an ka
Kada human, ako ra man gihapo'y maghilak.
Kapoya.

gasakit...daw bata nga gangipon

2010-04-27T05:49:00.000-07:00

mugna ni: jabberedonion

gasakit...daw bata nga gangipon
ug sa pagturok niing maong ngipon
ako mahimo nasad nga mungisi

Wala’y pua-puasa bisan semana santa

2010-04-25T22:24:00.000-07:00

mugna ni: Ad Hector, Abad, Ivan

Lubnga ko sa imong mga halok
Samtang ang atong mga dila magbugno ug magdakmalay
Wala’y pua-puasa bisan semana santa
Ug wa’y pildiro natong duha
Kay pareho tang mangusog
Uban sa bug-at nga pagdagayday sa atong mga singot
Diha sa nagsilaob natong mga lawas.
Hala, kiyod pa
Bungkaga akong bilat
Lawayi
Unya pachupaa ko
Dungan sawop sa adlaw
Ang akong ulo mosawm,
Ang baba naghinangol.
Sige, dunggaba
Hangtod ang kolor mamuwa
Sama sa kolor sa atong gugma.

nahinumdum ba ka?

2010-04-25T09:39:00.000-07:00

mugna ni: Charlie8937

sa dihang nipitik ang imong kasingkasing
sa pag-aninag sa kahayag sa iyang nawong
nahinumdum ba ka?

sa pagkamatngun sa gibati nga way sama
nga ni patigbabaw sa tanan nga kamingaw
nahinumdum ba ka?

sa pagbutyag sa tumong bisan sa kahuyang
sa imong mga tuhod dihang nakighimamat ka
nahinumdum ba ka?

sa kaanindot sa pahiyom sa iyang ngabil
nga nabati ang katahom sa iyang pagbati
nahinumdum ba ka?

sa pagkapukgang sa gugma tungod og alang kaniya
nga tua pa sa layong dapit aron matukib ang pagbati
nahinumdum ba ka?

sa imong pagbiya sa matahom nga dalaga
aron sa pagpakigbisok sa kapalarang labing halayua
nahinumdum ba ka?

sa pagbunok sa luha nga nidagayday sa mga aping
sa dalagang imong gibiyaan apan nagpaabot sa hilom
nahinumdum ba ka?

sa pagpamatood nga ang gugmang nagpaabot
mao ra ang gugmang tinuod
nahinumdum ba ka?

og sa dihang nibalik ka sa mga kamot sa nagpaabot
og gihangop ka sa ikaduhang higayun
nahinumdum ba ka?

ang paghigugma walay kutubanan
hangtud ang duha ka kasingkasing managhiuban
ang katakos sa inyong gibating gisaw-an
nahinumdum ba ka?

Mga Konduktor sa 21B

2010-04-25T09:07:00.000-07:00

mugna ni: Ad Hector

Dagko sila ug mga tingog
Mura’g Ginoo nga nagpasidaan ug
Kalamidad.
Ug kung mobukbok sila sa atop,
Daw liti sa umaabot nga lunop.

Walay ikyas bisa’g kinsa
Sa kilid sa dalan.
Birahon ka ug pasakyon
Mura’g arka ni Noah.
Pero what if dili diay ka padulong

Sa Jones-Ayala-Colon?
What if nag-standby lang ka
Sa sidewalk to contemplate
On things?
Ug kung tuod mosakay man ka,

Leche,
Pun-on pa.
Bisa’g gutom na kaayo, huwaton
Pa dyud
Nga ang dose-dose, fully occupied

Hangtod ma-trese, katorse,
Dayon hulbot sa extension.
Ug ang driver, naa’y certain
Sense of emergency.
Lupig ang ambulansya sa pabulhot.

Pero kining mga konduktor,
Mura’g vying for
Konduktor-of-the-month.
Gikan Hi-way
Hangtod National-Mango,

Wala sila’y hunong ug paningil.
Ug kung moplete ka ug sayo,
Dili ka sukli-an dayon,
Probably in the hopes nga
Makalimtan nimo ang sukli.

Ug kung makahuna-huna ka ug
Lingkod dapit sa entrance,
Think twice.
Kay usahay, ilang oten
Modusdus sa imong tuhod.

Kining 21B
Mura’g multibillion-dollar industry.
Hingpit ang kapitalismo.
Bakakan ka usahay kung pila na ang
Plete.

Kung naa lang koy
Superpower to make things happen,
Akong padak-on ilang mga totoy
Para mohapdos ilang atngal.
Kapoy ni silang mga konduktor sa 21B.

They love their jobs too much.
Kung wala lang intawon ko nangandoy
Nga mabalhin diri
Ug didto,
Dili ko, dili ko.

Pero.