11.26.2012

angie

mugna ni amber:

Nawala.
Pagkadaling nawala.

Uban sa usa ka masipang buto,
Ang matuod nawala daw aso.

Uban sa iyang pagkamatay,
Malubong ang tinuoray.

Ngano ug unsay hinungdan
Wala masayod ang tanan.

Pagkatalaw sa mga kaaway?
Kaguol sa mga kabanay?

Bayani o talawang kriminal
Sa Diyos ang hukom nga pinal.

RIP, Angie.


6.08.2011

kahilakon sa kamingaw

mugna ni jabberedonion:


nagtubod akong mata sa mga luha nga kaganina pa gusto mudagayday sa akong aping

ang akong kasingkasing di muhunong ug lagubo.
dungog bisan sa pikas baryo.

gusto nako motyabaw sa kamingaw.

intawn kaluy-i mahadlok kog mamaw.

pasiga-a ang suga kay ngitngit wa koy makita.

5.09.2011

Summer of '92

mugna ni: joythedestroyer



Usik!
Aron lang makasinati sa langitnong dulsi,
nausik ang tanan.
(Di nalang gyud kahuwat)



Sa sinugdan - gilugit, gikuot, gikulitog
Sa kahuot sa lungag punayg paninguha
(Daw nakigbisog sa unsang gubata -
armas ang kutsara, tagsang pamalikas
ug naglawit nga dila)
Aron moluwa ug pipila ka sensilyo.



Unsa nalang! Karon wa na gyud kapugngi (bisag
ang mga pinong kusi sa bugan)
ang kaganinang himsog nga sementong anay
karon napukan sa way
kukaluoy nga martilyo.
Ang pinintalang ngislit
sa iyang dagway
napikas daw naulaw
sa iyang natagamtam.
Bahandi nga natigum
sa panahong nangagi,
linugdangan nalang sa paghandum.